بالصورة | الصورة الأخيرة لفقيدة الصبا ثريا فواز التي رحلت بسبب انقطاع دواء القلب.. وزوجها ينعاها بكلمات مؤثرة!!

ودّعت صور أمس فقيدة الصبا السيدة ثريا محمود فواز (أم قاسم) بعد مضاعفات في القلب.

والراحلة هي أمّ متفانية في سبيل عائلتها وهي دائمة التفاؤل والإيجابية كما وصفها أصدقاؤها. وقد ترك رحيلها ألمًا وغصة بعد انتشار مقطع صوتي لها كانت قد أرسلته لإحدى صديقاتها عبر “واتساب” قبل وفاتها بأيام تشكو عبره من انقطاع دواء القلب الذي تأخذه من جميع الصيدليات وتعثّر الحصول عليه.

وقد تداول ناشطون صورة لها، مشيرين إلى أنّها آخر صورة لها قبل رحيلها بدقائق.

وقد تداولوا ايضاً نعي مؤثر كتبه زوجها لها، جاء فيه: “آخ يا وجع عمري وحرقة قلبي ..آخ شو عملتي فيي لا مش بس فيي بكل اللي بيعرفك يا ثريا.. معقول هلقد قصتنا قصيرة؟ معقول نهاية قصص الحب دايماً أليمة ؟معقول شمسك غابت هلقد بسرعة؟ وجمعتنا الحلوة كيف بدا تصير بلاكي؟ يا حبيبتي قومي ارجعي بكير لتفلي بعدنا بأول الطريق ومشوار دربنا طويل كتير. قاسم حبيب قلبك ابنك الحلو اللي بتشوفي حالك فيه حابس وجعو وقهرو وجرحو بركي ناطر يخلص هالكابوس ورِوى عروستنا دلوعتك مين بدو يبرم من مطرح لمطرح ليلاقيلا قطعة بتعجبها؟ مين بدو يسمعها ويسمع حديثها وينصحها مين بدو يشوفا عم تتخرج وبدو يجبلا فستانها الابيض مين بدو يزلغطلا وينعجق فيها؟ وآخ ع نور شو بوجّع نور هو مش عم يبكي مش عم يصرّخ بس كل شي نور جواته انطفى والله بعدو صغير يخسرك يا ثريا.. يا ثريا قومي نضهر ونسهر ونشمّ هوا قومي لانو بلاكي اسودت حياتي وايامي وسنين العمر اللي جاي.. يا ثريا مين بدو يدقلي ويفقدني ويقلي يا لولي وينك تعا؟ مين بدو يقلي قوم انكزدر بصور؟
مين بدو يسمعني يسمع قصصي ومشاكلي وحكياتي؟ وصوتك يا ثريا اللي بعتبرو دقات قلبي قولك قلبي بعدك ح يدق؟”.

وأضاف: “يا ثريا بدي روح عالبحر يلا ارجعي تستقبلي الناس وتقوليلن أهلا وسهلا، ارجعي تعجقي القعدات والسهرات والكل يقول نيال هالضحة اللي ما بتفارقك ارجعي يا ثريا بكير كتير تركتيني وتركتي ورداتك اللي بدي داريهن من نسمة الهوا كيف بدي خفف وجعهن وأنا موجوع ؟ كيف بدي قلن اصبروا وانا مش مصدق ؟ شو بدي غني لنور تينام؟ أمي يا ملاكي؟ مزبوط أمي يا ملاكي لأنو صرتي ملاكو الحارس من السما بكل خطوة ولحظة وأكيد ح يشعر فيكي بترافقيه بتساعديه قطعتي قلبي يا ثريا، وجعتيني يا ثريا .. كنتي ثريا مضوية حياتي ومن بعدك كل شي اندفن معك تحت الثرى”.

https://www.facebook.com/permalink.php?story_fbid=482841783178979&id=102993401163821